23 და 24 მარტს, ამსტერდამში საფეხბურთო ინდუსტრიის ერთ-ერთი ყველაზე მასშტაბური ღონისძიება - TransferRoom Summit გაიმართა. აღნიშნულ ფორუმზე დინამო ბათუმი კლუბის საფეხბურთო სტრატეგიის მენეჯერმა, ზურა თიგიშვილმა და ფეხბურთის განვითარების მენეჯერმა, ზურა ორაგველიძემ წარადგინეს.
2026 წლიდან ჩვენი კლუბი აქტიურად თანამშრომლობს აღნიშნულ სატრანსფერო პლატფორმასთან. ამსტერდამში გამართული ორდღიანი სამუშაო შეხვედრა რიგით მეორე ღონისძიებაა, რომელშიც დინამო ბათუმის წარმომადგენლები უშუალოდ იყვნენ ჩართულნი. აღნიშნულ ფორმატში მონაწილეობა კლუბს ეხმარება იმოქმედოს თანამედროვე ევროპული სტანდარტებით, სწორად შეარჩიოს პოტენციური ახალწვეულები და გაზარდოს საკუთარი მოთამაშეების სატრანსფერო პოტენციალი.
ზურა თიგიშვილი: „ჩვენი კლუბისთვის TransferRoom-ის პლატფორმაში მონაწილეობა სხვადასხვა მიზეზის გამოა მნიშვნელოვანი. პირველ რიგში, ის პირდაპირ წვდომას გვაძლევს კლუბებსა და სააგენტოებთან. ეს შესანიშნავი საშუალებაა, ჩვენი მოთხოვნების მიხედვით მოვიძიოთ სასურველი მოთამაშეები და გავიგოთ, რა ტიპის ფეხბურთელებს ეძებენ სხვა კლუბები.
აღნიშნული პროცესი გვეხმარება, ვიყოთ ეფექტურები სატრანსფერო ბაზარზე, გვქონდეს სწრაფი რეაგირება და გამჭვირვალე ინფორმაცია.
წელიწადში რამდენჯერმე TransferRoom პარტნიორი კლუბებისა და სააგენტოებისთვის სხვადასხვა ქალაქში შეხვედრებს აორგანიზებს. მსგავსი აქტივობები კარგი საშუალებაა მჭიდრო კავშირი დავამყაროთ ჩვენთვის საინტერესო ორგანიზაციებთან და მათთან ორმხრივი საჭიროებებისა თუ მოთხოვნების შესახებ ინფორმაცია გავცვალოთ.“
ზურა ორაგველიძე: „TransferRoom დღესდღეობით ბაზრის ლიდერი კომპანიაა, რომელიც სააგენტოებს, ფეხბურთელებსა და კლუბებს ერთმანეთთან აკავშირებს. ეს არის სანდო პლატფორმა თითოეული მხარისთვის ხარისხიანი პროდუქტის მისაღებად.
დინამო ბათუმისთვის ეს შესანიშნავი შესაძლებლობაა ახალი კონტაქტების დასამყარებლად და სხვა კლუბებთან კავშირების გასაძლიერებლად. ჩვენთვის სტრატეგიულად მნიშვნელოვანია ხარისხის გაუმჯობესება, რათა ვიყოთ სანდო პარტნიორი ძლიერი კლუბების, ლიგებისა და სააგენტოებისთვის.
მსგავსი შეხვედრები მნიშვნელოვანია ახალგაზრდული ფეხბურთის განვითარებისთვისაც, რადგან წვდომა გვეძლევა ევროპულ კლუბებში დანერგილ სიახლეებზე. აღნიშნული პროცესი ჩვენს კლუბს საშუალებას მისცემს, გააძლიეროს რამდენიმე ახალშექმნილი დეპარტამენტი და მწვრთნელთა განათლებისთვის კარგი პლატფორმა შექმნას.“
TransferRoom წარმოადგენს საფეხბურთო ტრანსფერების ინოვაციურ, დახურულ B2B (ბიზნესი-ბიზნესისთვის) პლატფორმას, რომელიც ერთმანეთთან აკავშირებს მსოფლიოს წამყვან კლუბებს, მათ სპორტულ დირექტორებს, სკაუტებსა და ვერიფიცირებულ საფეხბურთო სააგენტოებს. დღეისათვის სისტემაში 700-ზე მეტი პროფესიონალური საფეხბურთო კლუბია გაწევრიანებული.
პლატფორმის მთავარი მიზანი სატრანსფერო ბაზარზე გამჭვირვალობის უზრუნველყოფა და პროცესებიდან არაავტორიზებული შუამავლების გამორიცხვაა.
საფეხბურთო ფუნქციონერებისთვის აღნიშნული პლატფორმა წარმოადგენს უმნიშვნელოვანეს სამუშაო ინსტრუმენტს, რომელიც უზრუნველყოფს:
პირდაპირ კომუნიკაციას: კლუბებს ეძლევათ საშუალება, ტრანსფერებისა და იჯარის საკითხებზე მოლაპარაკებები წარმართონ უშუალოდ გადაწყვეტილების მიმღებ პირებთან, ზედმეტი ბარიერების გარეშე.
მიზნობრივ სკაუტინგს: პლატფორმის ალგორითმი კლუბებს ეხმარება მათ კონკრეტულ მოთხოვნებსა და ბიუჯეტზე მორგებული მოთამაშეების სწრაფად იდენტიფიცირებაში.
B2B ფორმატის შეხვედრებს: ამსტერდამის სამიტი, ტრადიციულად, მოიცავს ე.წ. „Speed-Dating“ (სწრაფი შეხვედრების) ფორმატს, სადაც მენეჯერებს აქვთ შესაძლებლობა, ლიმიტირებულ დროში გამართონ ინტენსიური მოლაპარაკებები ათობით პოტენციურ პარტნიორ კლუბთან და გაცვალონ ინფორმაცია სასურველ მოთამაშეებზე.
ბაზრის ანალიტიკას: ინტეგრირებული სისტემების საშუალებით (როგორიცაა xTV - მოსალოდნელი სატრანსფერო ღირებულება) ფუნქციონერები ადგენენ ფეხბურთელთა ობიექტურ საბაზრო ფასს.
TransferRoom-ის პლატფორმის აქტიური გამოყენება და მსგავსი მასშტაბის ღონისძიებებში მონაწილეობა დინამო ბათუმის განვითარების სტრატეგიის მნიშვნელოვანი ნაწილია. აღნიშნული ტიპის აქტივობა კლუბს ევროპულ პარტნიორებთან პირდაპირი კომუნიკაციის დამყარებასა და გლობალურ საფეხბურთო ბაზარზე პოზიციების განმტკიცებაში ეხმარება.