საქართველოს ეროვნული ჩემპიონატის მეორე წრე დინამომ გამარჯვებით დაიწყო. ბათუმურმა კლუბმა „ზუგდიდი“ მისსავე მოედანზე 1 – 0 დაამარცხა. დინამოელთაგან ერთადერთი გოლი ბოსნიელმა ლეგიონერმა, მარკო მიჰაილოვიჩმა გაიტანა.
- მარკო, დღევანდელი მატჩის გმირი აღმოჩნდი. პირველივე ოფიციალურ შეხვედრაში გატანილი გოლი გამარჯვების მომტანი გამოდგა ...
- არ დაგიმალავ, ძალიან მესიამოვნა. გატანილი გოლი ხომ სწორი მუშაობის შედეგია. თუმცა ასეთ დროს მნიშვნელობა არ აქვს ვინ იქნება მეგოლე, მთავარი ხომ სამი ქულაა?! აქვე მინდა ვთქვა, რომ საშინელ საფარზე ვითამაშეთ და ვერ გამოვიყურებოდით ისე, როგორც ეს შეკრების დროს დავხვეწეთ. სხვა პირობებში ჩვენი უპირატესობა აშკარა იქნებოდა.
- საქართველოში შვედეთიდან გადმოხვედი. შენს ბალკანურ კარიერაზე კი პრაქტიკულად არაფერია ცნობილი.
- ჩემი მშობლები მონტენეგროში ცხოვრობდნენ და მეც ფეხბურთს მონტენეგროში ვეზიარე. პირველი პროფესიული კლუბი კი ს.კ. ბელგრადი იყო. ბოლო ხუთი წელი კი შვედეთში უმეაში, ბრაგეში, ჰამარბიუში და სირიანსკაში გავატარე.
- შვედეთში გატარებულ პერიოდს როგორ გაიხსენებდი?
- შვედეთში გატარებული წლები დაუვიწყარია, თუმცა დგება პერიოდი, როდესაც ცხოვრებაში რაღაც უნდა შეცვალო. სიახლე მჭირდებოდა. მიუხედავად იმისა, რომ შემოთავაზებები სხვადასხვა შვედური, ნორვეგიული და სერბული კლუბებისგან მქონდა, არჩევანი მაინც დინამოზე შევაჩერე. მომწონს გუნდის ხედვები და ამბიციურობა, ყველაფერთან ერთად ჩვენი ხედვებიც ერთმანეთისას ემთხვევა. შვედეთი კარგი იყო, თუმცა ახლა ყველაფერი მხოლოდ ისტორიაა.
- მარკო, ქალაქის გაცნობა თუ მოახერხე?
- მცირე დროის მიუხედავად, რაც ვნახე ძალიან მომეწონა. ასევე სამზარეულოც დავაგემოვნე, მინდა გითხრა, რომ ძალიან მივამსგავსე სერბულს.
